“KUSHTETUTA MATERIALE NË SHKENCËN JURIDIKE DHE SI REALITET” Prof. Dr. Enver Hasani
“KUSHTETUTA MATERIALE NË SHKENCËN JURIDIKE DHE SI REALITET”
Prof. Dr. Enver Hasani
NJOHJA ME ENVER HASANIN, NË VITET ‘90
Nga Mal Berisha
Në vitet 1992–1997, nga zyra e Konsullatës së Përgjithshme të Shqipërisë në Stamboll, pata nderin të kontribuoj në çështjen e Kosovës. Në atë kohë, mbaja lidhje me Qeverinë e atëhershme në mërgim, e drejtuar nga Presidenti Ibrahim Rugova në Prishtinë, Kryeministri Dr. Bujar Bukoshi në Gjermani, si dhe me Qendrën për Informim të Kosovës (QIK) në Gjenevë, ku vepronte aktivisti i njohur Xhaferr Shatri, atëherë Ministër i Informacionit.
Njohja e bashkësisë ndërkombëtare me informacionet e përditshme që jepte QIK-u ishte një nga detyrat parësore të shërbimit tonë diplomatik të asaj kohe. Dhe këtë e bëmë shumë,shumë mirë në atë kohë.
Një nga personalitetet e angazhuara në këtë çështje ishte Prof. Dr. Enver Hasani i cili erdhi në Turqi pas shërbimit si këshilltar ligjor në Ministrinë e Punëve të Jashtme të Republikës së Shqipërisë. Në atë kohë ai ishte absolvent në studimet e doktoraturës në Universitetin Bilkent, Ankara. Me të pata një bashkëpunim të ngushtë, sidomos gjatë krizës së vitit 1997.
Këto ditë, tashmë Profesor Doktor i Jurisprudencës, z Enver Hasani më dhuroi librin e tij më të fundit, me një dedikim të veçantë për ato vite, të cilin po e ndaj me ju, së bashku me një vlerësim timin të shkurtër për librin.
* * * * *
Libri “KUSHTETUTA MATERIALE NË SHKENCËN JURIDIKE DHE SI REALITET”, i autorit Prof. Dr. Enver Hasani, paraqet një trajtim të thelluar shkencor të konceptit të kushtetutës materiale, duke e analizuar atë nga perspektiva historike dhe aktuale, duke përdorur metodën krahasuese.
Në këtë vepër, Prof. Hasani shqyrton fenomenin e KUSHTETUTËS MATERIALE, e cila, ndryshe nga KUSHTETUTA FORMALE që përfshin një tekst të shkruar me normat kushtetuese, përfshin edhe norma dhe praktika që, megjithëse nuk janë të kodifikuara në një dokument të vetëm, rregullojnë në mënyrë thelbësore organizimin dhe funksionimin e veprimtarisë shtetërore si dhe vetë marrëdhëniet midis shtetit dhe individit.
Autori analizon se si këto norma dhe praktika, të cilat mund të mos kenë formën e një KUSHTETUTE TË SHKRUAR, ndikojnë në strukturën dhe funksionimin e shtetit, duke marrë parasysh shembuj historikë dhe bashkëkohorë. Përmes kësaj analize, libri synon të ofrojë një kuptim më të thellë të konceptit të kushtetutës materiale dhe rëndësisë së saj në shkencën juridike.
Ky botim është një kontribut i rëndësishëm në literaturën juridike, veçanërisht në fushën e së drejtës kushtetuese, duke ofruar një perspektivë të re dhe të thelluar mbi mënyrën se si normat dhe praktikat joformale mund të kenë një ndikim të rëndësishëm në funksionimin e shtetit dhe në mbrojtjen e të drejtave të individëve.
Ky libër ofron një qasje të vlefshme mbi bashkëjetesën njerëzore brenda një bashkësie, një kombi dhe një shteti, duke e trajtuar atë në kuadrin e KUSHTETUTËS MATERIALE, e cila përcakton rregullat themelore juridike, qytetare dhe shoqërore mbi të cilat ndërtohet organizimi i një shteti.
Ky libër përbën një bazë shumë të vlefshme teorike dhe një udhërrëfyes praktik për juristët e nivelit të lartë në fushën e ligjit kushtetues. Ai meriton të jetë në duart e çdo juristi, duke filluar nga studentët e shkollave juridike e deri te profesionistët e së drejtës.
